Член на Лигата и шеф на градската канцеларија за безбедност во Вогера, Северна Италија уби Мароканец со кого претходно влегол во конфликт.
Уапсен е Масимо Адриатичи, советник во Лигата и поранешен полициски командант, а отворена е истрага за прекумерна употреба на сила, објави новинската агенција ANSA, повикувајќи се на извори на истрагата.
Локалната полиција не беше достапна за коментар на барање на новинската агенција Agence France-Presse.
Жртвата е 39-годишен Мароканец кој бил застрелан во градите.
Жртва на агресија
Според локалните медиуми, Мароканецот синоќа наводно ѝ додевал на жена пред бар на плоштадот во Вогера (близу Павија во Ломбардија), па градскиот советник решил да интервенира и повикал полиција. Мароканецот почнал да го турка и Адриатичи, кој имал пиштол со себе. Десничарскиот политичар тврди дека оружјето само испукало во моментот кога паднало на земја.
Матео Салвини, поранешен министер за внатрешни работи, тврди дека Адриатичи бил „жртва на агресија“ и реагирал во „легитимна одбрана“.
„Случајно пукаше, што за жал погоди странец“, рече Салвини во видео објавено на неговата Facebook страница.
Алан Ферари, централно-левичарски сенатор од Демократската партија и локален советник, го повика Салвини да ја осуди ваквата постапка.
„Во цивилизирана и демократска земја, шефот на градската канцеларија за безбедност не пука во никого“, рече Ферари.