Откако Масимилијано Алегри најави дека си заминува од Јувентус по истекувањето на договорот на крајот од сезоната, неколку тренери беа поврзувани со слободната позиција. Но, никој не очекуваше дека помеѓу кандидатите ќе биде и Пеп Гвардиола, за кој италијанските медиуми велат дека се договорил со раководството на „старата дама“.
Според спортскиот портал Calcio Mercato, Пеп Гвардиола ги прифатил условите на Јувентус и се очекува да го преземе италијанскиот шампион веќе од 4 јуни.
Проблемите на Манчестер Сити со финансиските нерегуларности за кои се под истрага од УЕФА можат да бидат вистински благослов за Јувентус, кој и онака мораше да бара тренер по крајот на оваа сезона. Италијанските медиуми тврдат дека Гвардиола веќе одлучил да потпише повеќегодишен договор со Јувентус кој почнува од 4 јуни, а официјално би бил претставен како нов тренер на 14 јуни.
Јувентус оваа сезона не успеа да ја оствари својата цел, триумф во Лигата на шампионите, и покрај тоа што во летниот преоден рок беше донесен Кристијано Роналдо, кој требаше да му помогне на тимот да го освои врвот на Европа.
Заминувањето на Пеп Гвардиола не би требало да ја зачуди фудбалската јавност. Иако тој освои домашен „требл“ со три трофеи во трите домашни натпреварувања (Премиер лига, ФА куп, Карабао куп), сепак над неговата глава виси потенцијалната забрана за учество во европските натпреварувања што му се заканува на Манчестер Сити поради неодамна откриените нерегуларности во финансиското работење.