Во пожар што пред неколку дена го зафати пристаништето во Савона, Италија изгореа стотици нови луксузни автомобили на италијанските производители Maserati и Fiat.
Според локалните медиуми, во пожарот што избил на 30 октомври, утрото во 3 часот и 30 минути, биле зафатени стотици нови возила, од кои најголем дел автомобили Fiat 500L, како и возила Maserati наменети за пазарот на Блискиот Исток.
На огнената стихија ѝ претходеше бура поради која нивото на водата во пристаништето Савона беше зголемено и паркингот на кој биле оставени новите автомобили предвидени за извоз бил поплавен.
Бидејќи биле изложени на солената морска вода, акумулаторите во некои од паркираните автомобили експлодираа, а силниот ветер придонесе за брзо ширење на пожарот и уништување на стотина автомобили.
Поради лошите временски услови, противпожарните екипи се мачеа да се справат со огнената стихија, а дополнителна опасност претставуваа повремените експлозии на автомобилите.
Нема повредени во инцидентот, ниту во напорите за гасење на пожарот.