Италијанските региони Венето и Ломбардија денеска гласаат на референдуми во кои граѓаните треба да се изјаснат дали сакаат поголема автономија за нивните регионални власти во однос на Рим.
Ќе имаат можност да се изјаснaт околу 11 милиони избирачи во двата најбогати региона во Италија.
Изборните места се отворени денеска од 07:00 до 23:00 часот, а на изборите е можно да се гласа единствено лично, но не и од странство или преку пошта.
Резултатите од референдумот ќе бидат објавени подоцна во текот на ноќта.
Иако политичарите од Ломбардија и Венето и порано се залагаа за независност од Рим, лидерите на овие два соседни региона на северот на Италија јасно истакнаа дека референдумите се однесуваат на автономија, а не на сецесија.
Инаку, сите десно ориентирани партии во Италија го поддржаа одржувањето на референдумот, иако повикаа да не се прават споредби со движењето за независност во Каталонија. И големата протестна партија Пет Ѕвезди, која моментално води на анкетите во пресрет на парламентарните избори кои се очекуваат во 2018 година, го поддржа одржувањето на денешниот референдум.
Регионалните власти на Ломбардија и Венето бараа поголеми овластувања во здравството, образованието и инфраструктурата, но и во контрола на границите, што станува едно од најважните прашања во Италија, која се најде притисната од големиот мигрантски бран од Либија.