Италијанското Министерство за надворешни работи претстави видео игрица наречена „ITALY. Land of Wonders“ со цел да се промовира туризмот. На овој начин земјата сака да го покаже своето културно наследство и природните убавини.
Игрицата е исто така дел од италијанската пост-ковид стратегија за помош на културниот и креативниот сектор. Може да ја играат и деца и возрасни, а преку интерактивно искуство имаат можност да се запознаат со привлечностите и традициите на земјата.
На играчите во истражувањето им помагаат многу интересни ликови, како на пример стариот чувар на светилници Елио кој ги воведува во историјата на Италија. Една од главните карактеристики на игрицата е саундтрак инспириран од италијанските класици.
„ITALY. Land of Wonders“ е исто така еден вид туристички водич. Содржи збирка од дури 600 текстови и се состои од стории, вести и интересни факти.
„Пазарот на игрици денес е еден од главните канали за ширење на секаков вид содржина, вклучително и културни и информативни теми. Нашата работа е да ја искористиме секоја можност да ја промовираме нашата земја и нејзината култура“, вели Лоренцо Анџелони, генерален директор за културна и економска промоција и иновации.
Тој исто така изјави дека сакаат да создадат чувство на блискост кај луѓето, што може еден ден да ги натера да дојдат во Италија и да ги купат нивните производи.