Со 62 гласа „за“ Собранието го изгласа предлогот за избор на заменици-министри во Владата.
Гласаа вкупно 67 пратеници, од кои пет од партијата Беса беа воздржани. Во согласност со предлогот, за заменик министер за одбрана е избран Беким Максути, за внатрешни работи Агим Нухиу, во Министерството за правда оди Оливер Ристовски, во Министерството за надворешни работи Арта Точи, во Министерството за финансии Ширете Елези, а во Министерството за економија Кире Наумов.
Власте Димковиќ е заменик министер за земјоделство, шумарство и водостопанство, Гоце Чакаровски за здравство, Висар Гани за образование и наука, Елми Азири за труд и социјална политика, Дејан Павлески за локална самоуправа, Владимир Лазовски за култура, Александар Бајдевски за информатичко општество и администрација, Ремзи Мехмеди за транспорт и врски, а Јани Макрадули заменик министер во ресорот животна средина и просторно планирање.
„Констатирам дека Собранието со мнозинство гласови ги избра лица за заменици-министри во Владата. Со оваа одлука на претходните заменици им престанува функцијата“, рече собранискиот спикер Талат Џафери по завршувањето на гласањето.
Пред самото гласање во името на пратениците од ВМРО-ДПМНЕ и коалицијата, пратеникот Илија Димовски рече дека тие ќе ја напуштат салата затоа што сметаат дека оваа е вештачки создадено мнозинство и вештачка Влада.
„Ова е вештачки, наметнато, присилено мнозинство и затоа ние нема да бидеме дел од одлуката што ќе ја носи. Учествувавме во дискусијата и бевме конструктивни, но нема да гласаме. Со овој чекор сакаме да пратиме порака дека одговорноста за одлуката ја носи ова мало, кревко мнозинство,“ рече Илија Димовски и како и своите останати колеги ја напушти салата.
Инаку во Собранието цел ден траеше расправата по оваа точка при што за збор беа пријавени 14 пратеници, најголем дел од ВМРО-ДПМНЕ. Тие обвинуваа дека предложените кадри се партиски послушници, без стручни биографии и дека нема да направат ништо од ветеното пред граѓаните. Премиерот Заев одговараше на прашањата од пратениците и тврдеше дека овие луѓе се бирани според своите портфолија и дека ќе придонесат за проектите во реформската Влада.