Во тинејџерските денови ни се чини дека имаме многу пријателки. И тоа не какви било, туку најдобри. За некои од нив мислиме дека ќе остареме со нив, а на други им ги простуваме испадите и ги поднесуваме за доброто на друштвото.
Токму овие вториве ве држат на барем еден чекор од спокој и среќа. За да не им го дозволувате тоа повеќе, време е да им кажете збогум.
Ако некоја од вашите „пријателки“ ја препознете во овие описи, време е да ја отсечете од вашиот живот.
(Не)пријателка бр. 1: Искористувачка
Тука е само кога нејзе ѝ треба нешто – да ѝ позајмите пари, да ја ислушате кога ќе раскине со дечкото или да направите некоја друга услуга за неа. Не ѝ паѓа на памет да ве праша искрено како сте и дали ви треба нешто. Важна е само таа и нејзините проблеми. Кажете ѝ чао.
(Не)пријателка бр. 2: Критикувачка
Сте се здебелиле: Прва ќе ви каже со потсмев. Сте ослабеле? Ќе најде начин да ви префрли за тоа. Секогаш наоѓа начини да ја нападне вашата самодоверба и да ве критикува. Тоа не е искреност, туку веќе преминува во злоба. А такви негативни луѓе не ви требаат во животот, без разлика колку време сте поминале заедно.
(Не)пријателка бр. 3: Конкурентка
Нејзиниот живот е една вечна игра, вечен натпревар. Секогаш се натпреварува со вас која е попаметна, поубава, позгодна, поуспешна, која има подобар дечко, стан, автомобил... Не е важна, темата, важно е да победува и тоа да биде подобра од вас, а другите да го знаат тоа. Не вредат спомените од средно, од факултетски денови или од заедничките одмори за да ја задржите во животот и понатаму, нели?
(Не)пријателка бр. 4: Copy/Paste
Сте купиле прекрасен впечатлив фустан и таа веќе го носи истиот наредниот ден. Сте ѝ кажале дека ви се допаѓа некој дечко и таа прва договара состанок со него. Ова е девојката која најверојатно ќе облече бел фустан на денот на вашата свадба. Кога ќе ги споредите на овој начин нештата веќе ви е јасно – оваа личност не заслужува да има место во вашиот живот ако сакате да живеете спокојно и среќно и секако, без драма.
