На првата собраниска седница од годината, владејачкото мнозинство ја поддржа интерпелацијата на Левица за Илире Даути, претседателката на Комисијата за социјална политика, демографија и млади.
Интерпелацијата ја образложи Сашко Јанчев кој рече дека Даути со нејзиното „несовесно, неодговорно, противуставно и противзаконско однесување“ го кочи Законот за бранители со тоа што не го става на дневен ред на Комисијата со која претседава.
Од Левица велат дека Собранието дефакто констатирало дека пратеничката Илире Даути го крши Уставот и законите со блокадата на Законот за бранители.
„Со ова се пресече јазолот во Собранието, кој ДУИ го создаде преку неделовничко и насилничко дејствување – наместо да се исползува народната волја, собраниските процедури се киднапирани“, велат од Левица.
Од партијата додаваат дека со својата проактивност го донеле мнозинството пред свршен чин, додека СДСМ и понатаму не успева да излезе од сенката на ДУИ и да фати чекор со нив кои ја водат главната опозициска борба.
Вкупно 61 пратеник ја поддржаа интерпелацијата на Даути, а на шестмината пратеници на Левица им се придружија оние на ВМРО-ДПМНЕ и ЗНАМ. Пратеници од партиите на албанското малцинство беа против, вкупно 22 гласа, додека пратениците на СДСМ не ја поддржаа интерпелацијата иако Законот за бранители беше токму нивен предлог.
