Свет

Излекуваните од корона вирусот да донираат крв, помага во лекувањето на болните

17. февруари 2020 - 20:24 | МИА

Кинеските здравствени власти денеска апелираа до лицата кои се излекувани од новиот корона вирус да дадат крв заради лекување други пациенти.

Крвната плазма на поранешните пациенти кај кои е потврдено присуство на вирусот Covid-19, содржи антитела кои можат да помогнат во уништување на вирусот.

„Би сакал да ги замолам оние што закрепнале да донираат крвна плазма. Тоа ќе им даде надеж на оние кои сѐ уште се сериозно болни“, изјави претставникот на Националната здравствена комисија Гуо Јанхон.

Во Вухан, епицентарот на епидемијата, 11 хоспитализирани пациенти добија плазма минатата недела, рече Сун Јанрон од Биолошкиот центар на Министерството за наука и технологија.

„Еден од тие пациенти веќе е пуштен од болница, а останатите заздравуваат“, додаде таа.

Официјални лица изјавија дека донаторите ќе бидат подложени на анализи за да се потврди дека не можат да го пренесат вирусот и дека само плазмата ќе биде извлечена од крвта на поранешните пациенти.

Фармацевтските компании се обидуваат да пронајдат лек и вакцина за повеќе од 70.500 заразени луѓе.

Коментирај