По повод 8 Септември, Денот на независноста на Република Македонија, и 10 Јуни, Светскиот ден на хералдиката, Македонското грбословно друштво и Културниот и информативен центар – Битола организираат изложба со наслов „Македонија во светот на хералдиката“. На изложбата ќе бидат претставени над 70 грбови поврзани со Македонија почнувајќи од XIV до XXI век.
Отворањето на изложбата е на 13 септември, петок, во 19 часот во КИЦ - Битола – Офицерскиот дом.
На 10 јуни 1128 година, во Руен (сегашна Франција), англискиот крал Хенри I го прогласил својот иден зет Годфри Плантагенет за витез. Во таа пригода му бил доделен грб, на син штит, 6 златни лава 3-2-1, кој се смета за прв запис за доделување грб во историјата. Затоа овој датум се прославува како Светски ден на хералдиката.
Хералдика или грбословие – наука што се занимава со правилата што владеат при дизајнирањето, блазонирањето (опишување, читање) на грбовите. Хералдиката е севкупност на грбови како симболичен идентитет на поединци и групи и земји.
Хералдиката е уметноста на исцртување на грбовите.
Изложбата на 35 панели се состои од два дела. Првиот дел е за историски грбови поврзани со Македонија од XIV до XVIII век, поделен во 3 дела: грбовите на Македонија од европските и илирските грбовници, на кралот на Македонија, припишаниот грб на Александар Македонски и принцот Македон од Ематија.
Вториот дел е за современи македонски грбови, поделен во 3 дела: грбови на институции и организации, општински грбови и лични грбови.
Автори на изложбата се потпретседателот Иван Нацевски и претседателот на Македонското грбословно друштво, д-р Јован Јоновски, а ликовното уредување е на Димитриј Михајловски од истото друштво, кое е единственото стручно тело по хералдика во Македонија.
