Израелскиот Парламент денеска му одобри на Министерството за здравство да им ги открива имињата на луѓето кои не биле вакцинирани против коронавирусот на другите тела на власта во земјата, предизвикувајќи критики за нарушување на приватноста на граѓаните кои не сакаат да се вакцинираат.
Законот, донесен со 30 гласа „за“ и 13 „против“, им дозволува на локалните власти, генералниот директор на Министерството за образование и на некои вработени во Министерството за социјални работи да ги дознаат имињата на овие лица, нивните адреси и телефонски броеви.
Одредбата, која ќе биде во сила три месеци или додека не заврши пандемијата, има за цел да им дозволи на властите да ги охрабрат луѓето да се вакцинираат обраќајќи им се лично, соопшти Парламентот.
Повеќе од 3 милиони луѓе во Израел веќе примиле две дози на вакцината на Pfizer/BioNTech, што е речиси една третина од околу 9 милиони жители.
Затоа во неделата стапи во сила третото отворање од почетокот на пандемијата кога беа отворени трговски центри и улични продавници за сите граѓани.
Некои места сепак се отворени само за оние кои примиле и втора доза од вакцината или прележале COVID-19 и имаат потврда за тоа.
Израелската Влада истакна дека целта е до април да се вакцинираат 6,2 милиони луѓе.
Од почетокот на пандемијата во Израел се регистрирани повеќе од 760.000 случаи на COVID-19, а повеќе од 5.600 луѓе починале.