Министерството за труд и социјална политика информира дека во периодот од 4 до 6 август 2017 година државните инспектори за труд – од областа безбедност и здравје при работа, на територијата на Република Македонија извршиле 207 инспекциски надзори кај работодавци за почитување на препораките за топлотен бран. Притоа се донесени 36 забрани на работодаваци кои не ги почитувале препораките да не се работи на отворено од 11 до 17 часот.
Државните инспектори за труд вршеа инспекциски надзори кај работодаваци од следниве дејности: градежништво, земјоделство, отпади, комунални услуги, конфекциски погони и други дејности.
Работодаваците ги добиваат следните препораки во писмена форма, со нагласување дека мора да се придржуваат кон нив бидејќи во спротивно ќе бидат санкционирани: aдекватна вентилација и ако е можно, климатизација во затворен работен простор, да не работат на отворено за време на најтоплиот период од денот, односно во период од 11 до 17 часот, промени во организацијата на работниот процес (воведување две смени), oбезбедување засолништа каде што вработените може да се разладуваат одреден период во текот на работата, почести паузи во текот на работата и консумирање течности, работната облека да биде од лесна порозна ткаенина, а при работа на отворен простор – очила и капи, предупредување за зголемени опасности од несреќа при работа (пожари).
Со оглед на тоа што територијата на Република Македонија и денеска се наоѓа во портокалова фаза, работодаваците се обврзани и понатаму да ги почитуваат дадените препораки и да се грижат за безбедноста на вработените во услови на топлотен бран.
