Јадењето на здрава храна нема да ви помогне да се чувствувате добро доколку храната која ја внесувате е премногу солена. Треба да го ограничите јадењето сол на препорачаната дневна доза за да не си го доведете здравјето во ризик.
Максималната количина сол која треба да ја внесувате дневно е 6 грама, и сѐ повеќе од тоа може да ви предизвика проблеми со здравјето.
Според последните истражувања беше докажано дека просечниот возрасен човек внесува многу повеќе сол отколку што е препорачано, што резултира во поголем ризик од висок крвен притисок. Просечниот возрасен човек консумира околу 10 грама сол секој ден, а тоа беше докажано со помош на тестови кои го мереа нивото на содиум во телото.
Содиумот го повишува крвниот притисок, кој пак може да предизвика срцев удар, срцеви проблеми, потешкотии со циркулациите и проблеми со дотокот на крв во мозокот, кој може да предизвика проблеми со меморијата и когнитивните способности.
Докторите советуваат дека сепак може да се реагира навремено доколку се забележат први знаци од покачување на притисокот, а најчесто се препорачува консумирање на храна која е богата со витамин Ц, влакна и омега-3 киселини. Тие најчесто се наоѓаат во овошје, зеленчук и зрнести плодови.
Неконтролираното внесување на сол во организмот не мора да се должи само на свесно посолената храна, туку многу почесто тоа е случај кога консумирате преработена храна, сувомеснато и храна од конзерва.