Здружението за канабис и зелени политики смета дека со предложениот Закон за контрола на опојни дроги и психотропни супстанци постојат одредени позитивни но и повеќе негативни моменти.
Јанаки Митровски, адвокат и еден од основачите на Здружението за декриминализација на канабисот во Македонија, се изјасни за ова во објава на социјалните мрежи што ви ја пренесуваме во целост:
-Дозволувањето да се извезува сув цвет е логично бидејќи досегашната одредба е идиотска, да можеш да извезуваш масло а не цвет. Но ова е меч со две острици како објаснето подоле
- Позитивно е што е тргната рекетарската “гаранција” како услов за добивање лиценца
- Негативно и противуставно е што се бара согласност од владата за пренос на удел. Ова директно ја тангира приватната сопственост како уставно заштитена категорија.
- Негативно е што условите остануваат крајно високи дури и се зголемува бројот на минимум вработени со што овој бизнис останува привилегија само на богатите и моќните
- Негативно е воведување арач од 10% по оданочување кои средства наместо за едукација на лекари, евентуално лекување, овозможување пристап до медицински канабис на социјално ранливи категории ќе се користат за финансирање на НВО-а. Предлогот на БИЛКА беше и остана да биде услов за ентитетите да пласираат легален канабис на МК пазар ако сакаат лиценца. Во МК има 65 фирми а производи од само три. Кој е бенефитот на граѓаните ако целиот канабис оди надвор?
За крај овој закон не исполнува услови за Европско знаменце. Дотолку повеќе сме разочарани што воопшто не е дискутиран на Работна група при Влада, а не е дека не знаеле. Следниот состанок на групата е 15.08 и да се надеваме дека ќе биде прва точка на дневен ред со цел истакнување забелешки по истиот.