Станува збор за сателитот LignoSat кој името го добил од латинскиот збор за дрво. Развиен е од Универзитетот во Кјото во соработка со Sumitomo Forestry и беше дел од мисијата на SpaceX на Меѓународната вселенска станица (МВС).
Сателитот е тест за издржливоста на дрвото во суровите услови кои владеат во вселената, а доколку се покаже успешен, научниците имаат намера да направат повеќе дрвени структури и да ги лансираат во вселената.
„Со помош на дрво, материјал што можеме сами да го произведеме, ќе градиме куќи и ќе живееме и работиме во вселената засекогаш“, рече Тако Дои, астронаут поврзан со Универзитетот во Кјото. Ова е прв чекор во 50-годишниот план, кој вклучува садење дрвја и изградба на дрвена куќа на Месечината, па дури и на Марс.
„На почетокот на 1900-тите, авионите беа направени од дрво. Дрвен сателит треба да биде изводлив“, вели професорот Коџи Мурата.
Оние кои се противат на идејата за дрвени структури во вселената треба да разгледаат некои од предностите. Материјалот всушност треба да биде поиздржлив во вселената отколку на Земјата, бидејќи бескрајната празнина нема вода или кислород. Нема ништо што предизвикува гниење и тешко дека ќе се запали. Исто така, дрвото дури нуди прилично пристојна заштита од радијација.
Друга причина е поврзана со сите други сателити во орбитата. Земјата моментално е опкружена со повеќе од 3.000 сателити, а има и различен отпад поврзан со нив. Дрвените сателити на крајот би паднале на Земјата, односно би изгореле при влегувањето во нејзината атмосфера.
Металните сателити генерално исто така согоруваат, но не пред да создадат штетни честички од алуминиум оксид. Во моментов нема план како да се справиме со зголеменото количество вселенски отпад што ја затрупува планетата, така што дрвените сателити би можеле да помогнат. Дои предвидува сценарио во кое „металните сателити би можеле да бидат забранети во иднина“.
