Живот

Јапонија го тестира супербрзиот воз со максимална брзина од 400 км/ч

14. мај 2019 - 11:57 | К.З.

Во Јапонија вчера започна тестирањето на новата генерација супербрзи возови (возови-куршуми), модел кој го носи името Alfa-X. Возот ќе го произведуваат компаниите Kawasaki Heavy Industries и Hitachi, а тој може да достигне максимална брзина од 400 км/ч.

Иако Alfa-X може да вози и побрзо, сепак поради безбедноста на патниците се очекува дека тој ќе сообраќа со брзина од 360 км/ч кога конечно ќе биде пуштен во служба во 2030 година. Но, пред да се случи тоа, тој ќе мора да помине серија од тестови на пругата која ги спојува градовите Аомори и Сендаи.

За подобро да се справува со големите брзини, возот има аеродинамичен нос долг 22 метри, кој е дизајниран така што го минимизира притисокот и ја намалува количината на бучава која ја креира возот при возењето, а посебно кога поминува низ тунели. Покрај стандардниот нос, ќе биде тестиран и нос од 16 метри.

Alfa-X ќе стане најбрзиот воз-куршум на светот кога ќе се појави во 2030 година, но нема да го добие приматот на најбрз воз на светот. Таа титула во моментов му припаѓа на шангајскиот магнетен воз, кој користи магнети за да лебди над шините и така не креира притисок и нема забавување од триењето со површината. Неговата максимална брзина изнесува 431 км/ч, а тој ќе биде пуштен во употреба во 2027 година.

Коментирај