Високо рангирана јапонска групација во која членува и поранешен премиер, изготвила планови за Tesla да инвестира во Nissan. Овој потег доаѓа по неуспешните преговори за спојување на Nissan со Honda, објави денеска Financial Times.
Групацијата се надева дека компанијата на Илон Маск ќе стане стратешки инвеститор, верувајќи дека Tesla е особено заинтересирана за фабриките на Nissan во САД. Иницијативата ја предводи Хиромичи Мизуно, поранешен член на одборот на Tesla, со поддршка од поранешниот премиер Јошихиде Суга и неговиот поранешен советник Хирото Изуми.
Канцеларијата на Суга изјави дека не е запознаена со ваков план. Иако Суга не е веќе премиер од 2021 година, тој сè уште е пратеник во долниот дом на јапонскиот парламент, претставувајќи ја Канагава - матичната префектура на Nissan.
Nissan одби да ја коментира објавата, додека Tesla не одговори на барањата за коментар. Reuters не успеа веднаш да стапи во контакт со Изуми и Мизуно.
По објавувањето на оваа вест, акциите на Nissan пораснаа за 9,6%. Минатата недела, Nissan и Honda ги прекинаа разговорите за создавање на заедничка автомобилска компанија вредна 60 милијарди долари, по што Nissan најави дека ќе бара нови партнерства.
Financial Times известува дека некои членови на одборот на Nissan ги предложиле Tesla и Apple како идеални стратешки инвеститори. Apple не даде коментар по ова прашање.
Извори на Reuters открија дека Nissan е отворен за соработка со нови партнери, при што тајванскиот Foxconn се смета за еден од потенцијалните кандидати. Сепак, извршниот директор на Nissan, Макото Учида, минатата недела изјави дека компанијата нема водено разговори со Foxconn на менаџерско ниво.
