Јапонија прва обезбеди пласман на Мундијалот 2026

Уште непочнати квалификациите на Стариот континент, а репрезентација на Јапонија официјално се пласираше на Светското првенство следната година, откако ја оправда улогата на фаворит на домашен терен со победата над Бахреин од 2:0.

Уште пред денешната пресметка во Саитама се знаеше дека „Самураите“ се блиску до осмото последователно учество на планетарниот собир, а сите дилеми беа решени со очекуваната победа.

Јунак на јапонскиот триумф беше првотимецот на Реал Сосиедад, Такефуса Кубо, кој најпрвин му асистираше на Даичи Камада во 66. минута за водство од 1:0, а потоа ја удвои предноста за конечни 2:0 на три минути до крајот на натпреварот. Кубе беше прогласен и за играч на натпреварот.

На три кола пред крајот на третата фаза од азиските квалификации, Јапонија ги реши сите дилеми околу квалификациите за Мундијалот, бидејќи нема теоретски шанси да падне под второто место.

Табела:

Да потсетиме дека Јапонците својот најголем успех го постигнаа со пласманот во осминафиналето на Светското првенство во 4 наврати, и тоа во 2002, 2010, 2018 и 2022 година. На Мундијалите учествуваат без прекин од 1998 во Франција, кога дебитираа.

Јапонија е четвртата репрезентација учесник на Мундијалот 2026, откако претходно беа познати само кодомаќините Канада, САД и Мексико.