Најстариот син на јапонскиот премиер Фумио Кишида ќе се повлече од функцијата извршен секретар за политика по реакциите во јавноста бидејќи ја користел официјалната резиденција на премиерот за приватна забава.
На фотографиите објавени од неделникот Shukan Bunshun се гледа дека синот на премиерот, Шотаро, и десетина роднини позираат или лежат на симболично важните скали со црвени тепих во резиденцијата, имитирајќи групни фотографии од новоименуваниот кабинет.
На други фотографии се гледаат гостите како стојат на подиумот како да одржуваат прес-конференција.
Оставката на Шотаро Кишида е удар за неговиот татко, чиј рејтинг се подобри веднаш по самитот на Г7 овој месец во Хирошима и очигледниот обид за атентат врз него за време на неговата кампања минатиот месец.
„Како секретар за политички прашања [на премиерот], неговите постапки беа несоодветни и решив да го отстранам за да преземам одговорност. Се разбира, одговорноста за назначувањето е на мене“, рече Кишида во понеделникот вечерта.
Главниот секретар на кабинетот Хироказу Мацуно претходно го опиша настанот како „несоодветен“ и вети дека ќе се погрижи резиденцијата повторно да не биде злоупотребена.
Зградата стара речиси 100 години претходно служеше како премиерска канцеларија, а беше претворена во станбени простории во 2005 година кога беше изградена нова канцеларија.
Ова не е првпат Шотаро (32) да биде критикуван за злоупотреба на службената положба. Во јануари, додека го придружуваше татка си, тој беше укорен затоа што го користел автомобилот на амбасадата за приватни патувања во Британија и Париз и оти одел да купува сувенири за членовите на кабинетот во луксузна стоковна куќа во Лондон.
