Масафуми Нагасаки, кого медиумите го нарекуваат „јапонскиот Робинзон Крусо“ и „голиот пустиник“, по 30 години беше принуден да го напушти островот Сотобанари и да се врати во цивилизација.
82-годишниот Јапонец во изминатите 30 години живееше изолиран на островот во близина на Окинава. Тој беше единствениот жител на островот и планираше да остане таму сѐ до неговата смрт.
За жал, желбата нема да му се оствари бидејќи му беше наредено да го напушти островот и да се врати во цивилизација, а тој со сите сили се обидува да пружи отпор кон властите кои наредија да се пресели.
„Си го ризикував животот за да го заштитам островот и не сакам да си заминам. Никогаш не сум бил тажен во овој рај. Овде имам сѐ што ми треба, ништо друго не барам. Сакам да умрам тука, кога ќе дојде тајфунот, да не може никој да ми помогне“, рече тој.
Сепак, локалните власти проценија дека поради неговото слабо здравје тој веќе не може сам да се грижи за себе и одлучија, наспроти неговото противење, да го преселат во најблискиот град.
Полицијата го пресели во градот Ишикаги, на 60 километри од островот и дивата природа му ја замени со четири ѕида. Неговата адаптација во цивилизација не помина баш најдобро.
Само што дојде во градот, Нагасаки се разболе од грип. Како што пишуваат медиумите, Јапонецот низ годините развил имунолошки систем и антитела за да се заштити од убоди на инсекти и други „опасности“ од природата, а не за болести што демнат во цивилизација.
Нагасаки долги години работел во забавната индутрија и во 1989 година решил да го напушти човештвото и да се пресели на островот Сотобанари. Тој живееше како пустиник и уживаше во потполна анонимност додека во 2012 година не го открија новинари на агенцијата „Ројтерс“.
„Не го правам она што ми го налага општеството, но ги почитувам правилата на природата. Не можеш да ја победиш природата, туку мора да ја слушаш. Тоа го научив кога дојдов овде и тоа е најверојатно причината зошто се снајдов и преживеав“, рече тогаш Нагасаки за „Ројтерс“.