МВР бара најдобари понудувачи за набавка на нови чевли, џемпери, кошули, високи специјални чизми и капи и беретки за припадниците на полицијата.
Повеќето од постапките за набавка на нова облека и обувки за полицијаците се актуелни до средината на декември до кога треба да се јават понудувачите.
Според распишаните огласи на интернет-страницата за јавни набавки, МВР за оваа намена планира да потроши 99 милиони денри, при што најмногу пари, односно 35 милиони денари, без ДДВ, се предвидени за купување високи специјални чизми. Јавниот оглас за набавка на чевли е 25 милиони денари.
За кошули, капи и беретки предвидени се по 14 милиони денари, а за џемпери 11 милиони денари.
За оваа набавка министерот Спасовски информира по доаѓањето на функцијата кога најави дека ќе набави 7.000 нови униформи за полицијаците и припадниците на ЕСЗ, кои не биле сменети 10 години.
Претходно, како што најави тој, МВР набави и 400 компјутери и канцелариски мебел за неколку полициски станици.
На дотраената униформа и старите чевли на полицајците во неколку наврати реагира и полицискиот синдикат. Од таму бараа и подобрување на условите во полициските станици, особено на граничните премини и караулите.