Кошаркарите на Денвер Нагетс поведоа со 2:1 во финалната серија на НБА против Мајами Хит откако победија со 109:94 како гости, а феноменалниот Никола Јокиќ повторно се истакна со трипл-дабл учинок со кој испиша историја.
Прашањето за победникот беше решено во вториот дел, поточно на почетокот на последната четвртина кога Денвер успеа да дојде на +21 и до крајот рутински го сочува големото водство за нов брејк во серијата.
Јокиќ натпреварот го заврши со 32 поена, 21 скок и 10 асистенции, со што стана првиот играч во финалето на НБА кој постигнал најмалку 30 поени, 20 скока и 10 асистенции.
Извонреден беше и Џамал Мареј кој постигна дури 34 поени, со 10 асистенции и 10 скокови.
Кај домашните се истакнаа Џими Батлер со 28 и Бам Адебајо со 22 поена, но тоа беше премалку со оглед на тоа што потфрлија останатите соиграчи.
По натпреварот, Јокиќ беше прашан колку му значи тоа што стана првиот играч во историјата што успеал да постигне учинок од најмалку 30 поени, 20 скока и 10 асистенции, но тој повторно го префрли целиот фокус на тимот, на соиграчите и на она што е најважно - победата.
„Да бидам искрен, тоа не ми значи толку многу. Мило ми е што победивме, нѐ победија во нашата арена и не сакавме да дојдат до предност“, изјави Јокиќ.
Зборуваше и за тоа што бил клучот за победата на третиот дуел.
„Бевме концентрирани, иако на крајот имавме недоразбирања, генерално нашата комуникација во играта беше на високо ниво и затоа мислам дека победивме“.
Следниот меч е закажан за ноќта меѓу петок и сабота, кога Денвер ќе има можност да се доближи на чекор до шампионската титула. Натпреварот почнува во 2:30 часот по македонско време.