Јокиќ се врати од повредата против Бакс и издоминира со нови рекорди

Најдобриот светски кошаркар Никола Јокиќ се врати од повредата против Милвоки Бакс и доминираше, поставувајќи нови рекорди.

Јокиќ пропушти 5 натпревари поради повреда на левиот зглоб, а во својот камбек го нокаутираше Милвоки.

Денвер Нагетс победи со 127:117, а Јокиќ натпреварот го заврши со 39 поени, 10 скокови и 10 асистенции.

Тоа беше 30-ти трипл-дабл за Јокиќ сезонава со што постави личен рекорд и рекорд на Нагетс по број на трипл-дабли во една сезона.

Јокиќ, исто така, стана само четвртиот кошаркар од основањето на најсилната лига во светот кој постигнал 30 трипл-дабли во една сезона. Пред него тоа го постигнаа само Расел Вестбрук (три пати), Оскар Робертсон и Вилт Чејмбрлејн.

Да потсетиме, на вечната листа на трипл-дабли Јокиќ е на третото место со вкупно 161. Пред него се само Оскар Робертсон со 181 и Расел Вестбрук со 203 трипл-дабли.

Со оглед на тоа дека Јокиќ штотуку наполни 30 години, а под услов здравјето да му дозволи, нема сомнеж дека има исклучително реални шанси да ја заврши кариерата на врвот на оваа престижна листа.