Кошаркарите на Денвер Нагетс синоќа го победија Феникс Санс со 117:90 и го подобрија својот рекорд на 16-11 оваа сезона. Моментално се на петтото место во Западната конференција на НБА лигата, а синоќа до нова победа ги предводеше Никола Јокиќ со 32 поена и 7 асистенции за 30 минути на паркетот.
Вечерва е ден за одмор во НБА, а в среда на Божик традиционално ќе гледаме пет натпревари. Последната ќе ја играат кошаркарите на Феникс и Денвер од 4:30 часот по македонско време. По новата победа, српскиот кошаркар беше на прес-конференција на која меѓу другото беше запрашан колку му е тешко да игра на празник.
На американските новинари, се чини, не им е познато дека Јокиќ е православен христијанин и дека Божик го слави на 7 јануари. Запрашан за коментар за натпреварите што ќе се играат на празникот, Јокиќ даде краток и јасен одговор: „Ништо. Не ми е мене Божик. Тоа е само уште еден натпревар“.
Центарот на Денвер Нагетс моментално е главен фаворит за уште една награда за МВП во лигата. Јокиќ е втор најдобар стрелец во лигата со просек од 30,9 поени, петти најдобар скокач со просек од 12,5 скока и трет најдобар асистент со 9,7 асистенции по натпревар.
Јокиќ освои три од последните четири МВП награди, а ако ја освои четвртата би станал само шестиот кошаркар во историјата на НБА со најмалку четири МВП трофеи. Пред него го направија тоа:
- Карим Абдул Џабар (6)
- Мајкл Џордан (5)
- Бил Расел (5)
- Вилт Чејмбрлејн (4)
- Леброн Џејмс (4)
