И понатаму траат шпекулациите за тоа каде ќе ја продолжи кариерата францускиот репрезентативец Набил Фекир, а во целата приказна сега се вклучи и Манчестер Јунајтед.
Пред неколку недели Фекир беше на чекор од трансфер во Ливерпул за 53 милиони фунти, договори петгодишна соработка вредна 140.000 фунти неделно, но во последен момент Олимпик Лион ги прекина преговорите.
Во меѓувреме, претседателот на Лион, Жан-Мишел Ола, откри дека „разговарал“ со менаџерот на Манчестер Јунајтед, Жозе Мурињо.
„Имав долг разговор со Мурињо пред неколку дена. Лично, повеќе не преговарам со Ливерпул. Јас дадов зелено светло за трансфер, меѓутоа целиот тој процес траеше премногу долго. Моментално навиваме за Франција и Набил да имаат одлично Светско првенство“, изјави Ола.
Се чини дека Португалецот е исклучително заинтересиран за талентираниот плејмејкер, па Јунајтед лесно би можел да ги зголеми своите трошоци за засилувања ова лето.
Досега на „Театарот на соништата“ пристигнаа десниот бек Диого Далот, како и бразилскиот играч за врска Фред, за околу 70 милиони фунти.
Фекир постигна 23 погодоци минатата сезона во дресот на Лион, а во Ливерпул го гледаа како идеален наследник на Филипе Кутињо, кој ова зима направи трансфер во Барселона.
