Манчестер Јунајтед и Севиља не ги потврдија фаворитските улоги и на отворањето од новата сезона во Лигата на шампионите едните загубија, а другите ремизираа дома.
„Црвените ѓаволи“ стартуваа со Кристијано Роналдо во составот и уште во 13. минута најавија победа на гостувањето во швајцарски Берн кај Јанг Бојс. Но, потоа во 35. минута Арон Ван-Бисака заработи директен црвен картон поради остар старт и ги остави своите играчи со десетмина да го бранат минималното водство.
Иако непознат и неатрактивен противник, сепак Јанг Бојс како актуелен швајцарски шампион ја искористи играчката предност и со голот на камерунскиот репрезентативец Муми Нгамалју во 66. минута го израмни резултатот.
Домашните не се откажаа и успеаја дури и да победат и тоа благодарение на Американецот Џордан Сибачо кој длабоко во судиското надополнување ја смести топката во мрежата на Давид де Хеа.
На „Рамон Санчес Писхуан“ публиката виде дури четири пенали од кои три беа за гостинската екипа која промаши дури двапати.
Прво во 13. минута пеналот на Карим Адејеми заврши крај десниот дирек, но осум минути подоцна Лука Сучиќ беше прецизен од истата позиција за водство на гостите од Австрија.
Неверојатно, но во 37. минута Салцбург доби и трет пенал. Сучиќ повторно ја презеде одговорноста, но овој пат неговиот удар ја затресе десната статива.
Три минути пред паузата по одлука на ВАР пенал доби и Севиља, а успешен реализатор беше Иван Ракитиќ израмнувајќи на 1:1.
Само што почна вториот дел, во 50. минута Јусеф Ен Несири доби втор жолт за исклучување, но и покрај играњето со десетмина на Севиља гостите не успеаја да постигнат победнички гол.
Останатите натпревари се играат вечерва од 21 часот.