Брисел, 23 март 2021 (МИА) – Потпретседателката на Европската комисија, Вера Јурова, денеска поднесе предлог иницијатива за зголемена заштита на новинарите во ЕУ, вклучително и родово базираното насилство.
Европскиот медиумски форум е прва иницијатива од ваков вид во Европската Комисија, која смета дека безбедноста на новинарите во Европа е сѐ позагрозена.
-Убиствата на Дафне Каруана Галициа и Јан Кучак требаше да бидат аларм за Европската Унија. Меѓутоа заканите и нападите врз новинарите се сѐ почести, тие се закани врз демократијата во целост. За прв пат Европската Комисија работи на иницијатива посветена на безбедноста на новинари која треба да донесе опипливо подобрување на терен, изјави Јурова.
Европската Комисија за оваа иницијатива отвора дијалог со сите клучни чинители во областа на новинарството и медиуми до 25 март: новинарски здруженија, новинари, медиумски куќи, европратеници и земји членки на ЕУ.
Откако ќе завршат консултациите Европската Комисија ќе истапи со препораки со земјите членки за да се заштитат новинарите вклучително и на интернет.
Предлогот има за цел да ги зголеми постоечките стандарди за заштита на новинарите, да се справи специфично со сајбер напади и онлајн насилство и посебно оние закани базирани на родот. Во речиси сите земји членки во ЕУ, жените и припадниците на малцински групи се најчести мети на напади и насилство помеѓу новинарите.
