Домашниот дрес на Јуве за наредната 2022/23 сезона ѝ беше претставен на јавноста, а првите впечатоци се позитивни.
На прв поглед не е јасна инспирацијата зад дизајнот, бидејќи прилично е различен од стандардниот дизајн на Јуве кој е попроста верзија на клупските бои.
Опишани од производителот Adidas како „продолжување на наследството на постојано реинвентирање“, назабените монохроматски ленти се формираат од серија триаголници, засновани на „пет триаголници што сочинуваат ѕвезда“ и се толкуваат како „магичен симбол... за да ја претставуваат магијата на стадионот 'Алијанц'“.
„Јувентус е клуб познат по својата традиција, но и по тоа што е смел и прогресивен. Со овој дрес сакавме да ѝ оддадеме почит на гордата историја на клубот и воедно да внесеме нов и уникатен елемент кој ги обединува клупската заедницата со суптилната референца на неговиот дом“, објасни главниот дизајнер на Adidas, Марко Омиколи.
„Дресот ги користи исконските бои на Јувентус, црната и белата“, се додава во соопштението на клубот, „со инкорпорирање на привлечни и иновативни графики, кои го земаат својот триаголен облик од истата геометриска фигура која е составен дел од архитектонската структура на стадионот“.
Јуве игра на „Алианц“ стадионот од 2011 година, а со новиот дрес ќе дебитира токму на тоа место во понеделник кога Лацио ќе гостува во Торино од 20:45 часот. Дресот како реплика е веќе достапен за нарачка, додека продажбата на оригиналната верзија ќе започне на 8 јули.