Руската новинарка Марина Овсјаникова, која во директен пренос протестираше против нападот на Украина, денеска потврди дека побегнала од домашен притвор каде завршила поради наводно повторно ширење на лажни вести.
„Се сметам себеси за целосно невина и бидејќи нашата земја одбива да ги почитува нејзините закони, одбивам да ја почитувам забраната што ми беше наметната на 30 септември 2022 година и се ослободувам од неа“, напиша таа на нејзиниот канал на Telegram. Нејзиниот адвокат изјави дека 44-годишната новинарка требало да се појави на рочиштето во 10 часот по московско време и дека моментално не се знае каде се наоѓа.
Во август, Овсјаникова беше осудена на два месеци домашен притвор за протестот во јули, каде што стоеше до Кремљ со плакат на кој рускиот претседател Владимир Путин го нарекува убиец, а неговите војници фашисти.
Таа се соочува со 10 години затвор за ширење лажни вести за руските вооружени сили. Нејзиниот домашен притвор требаше да трае до 9 октомври, но државниот медиум Russia Today во саботата напиша дека таа избегала со нејзината 11-годишна ќерка и дека не се знае каде се наоѓаат.
Сè уште не е јасно како успеала да побегне, а во понеделникот нејзиното име и фотографија се појавија на официјалниот список на бегалци од Министерството за внатрешни работи.
Таа во денешното соопштение потврди дека избегала и го критикуваше членот од законот според кој е обвинета бидејќи „ја кажува вистината“. Русија донесе нови закони за „намерно ширење лажни информации“ на 4 март, осум дена по почетокот на нападот врз Украина.
Претходно во март, Овсјаникова се појави пред камерите во едно телевизиско студио за време на информативна програма носејќи транспарент „Стоп за војната“ и „Ве лажат“.
