Цените на лебот во ЕУ во август пораснаа во просек за 18 отсто поради војната во Украина, што е највисоко откако Европската канцеларија за статистика ги објави податоците.
Во август минатата година просечната цена на лебот во ЕУ е за три отсто повисока во однос на истиот месец од претходната година, објави Евростат, кој собира податоци од 2017 година.
Русија и Украина се големи извозници на жито, чиј извоз е отежнат поради блокадата на пристаништата на Црното Море. Русија, од друга страна, го загуби пристапот до пристаништата на Балтичкото Море преку кои извезуваше амонијак, клучна состојка за производство на азотни ѓубрива. Тоа поттикна силен раст на цените на житото на светските берзи, што се почувствува и во ЕУ.
Во споредба со август минатата година, лебот најмногу поскапе во Унгарија и тоа за дури 66 отсто. Следат Литванија, со лебот поскап за 33 отсто и Естонија и Словачка, каде што цената поскапе за 32 отсто. Многу блиску до нив е и Хрватска, каде што цената на лебот во август годинава била за 31 отсто повисока од истиот месец 2021 година, покажаа табелите на Евростат.
Лебот најмалку поскапе во Франција
Во групата се и Полска и Летонија со приближно 30 отсто поскап леб отколку во август минатата година. Поскапувањето на лебот во Германија и Словенија, важни хрватски трговски партнери, е најблиску до просекот во Унијата, покажуваат податоците на Евростат.
Најскромно поскапување на лебот е забележано во Франција, од осум отсто, а потоа во Холандија и Луксембург, каде поскапува за 10 отсто. Цените на лебот во ЕУ континуирано растат од почетокот на годината, а во февруари, кога започна руската инвазија на Украина, во просек беа повисоки за 8,3 отсто во однос на истиот месец од претходната година.
Во категоријата леб и житарки, цените во август се во просек за 16,6 отсто повисоки во однос на истиот месец лани, што претставува нивен најголем пораст од најмалку јануари 1997 година, покажуваат податоците на Евростат.
Растот на цените на производителите во Германија достигна нов рекорд во август, поттикнат од цените на енергијата, покажуваат податоците објавени од Destatis.
Производните цени во Германија се зголемија за 45,8 отсто во август во споредба со истиот месец минатата година, што е најмногу од 1949 година кога германскиот завод за статистика почна да објавува податоци, надминувајќи го рекордниот пораст од 37,2 отсто во јули. Во однос на јули, тие се повисоки за 7,9 отсто, што е и највисок раст откако Destatis објавува извештаи. Тие во јули се зголемени на месечно ниво за 5,3 отсто.
Во август цените на енергенсите беа повеќе од двојно повисоки од истиот месец лани. На месечно ниво се зголемени за 20,4 отсто. Струјата за дистрибутерите поскапела речиси четири пати, а гасот трипати поскапа од август лани.
Поскапуваат и млекото, месото, кафето...
Кога ќе се исклучат цените на енергијата, производствените цени беа повисоки за 14 проценти.
Поради поскапувањето на енергенсите, забележително пораснаа и цените на интермедијарните производи, за 17,5 отсто, но и на трајните и нетрајните производи за широка потрошувачка за 10,9 и 16,9 отсто, соодветно.
Прехранбените производи пораснале за 22,3 отсто, а путерот скокнал за 74,6 отсто во споредба со ланскиот август. Скокнаа и производствените цени на непреработените растителни масла, за 51,4 отсто. Млекото и кафето поскапеа за третина, а месото без живина за четвртина поскапо од август 2021 година.
