Скопје, 6 август 2019 (МИА) – Претседателката на Атлетската федерација на Македонија Александра Војнеска Зикова и директорот на Агенцијата за млади и спорт Дарко Каевски одржаа заеднича прес-конференција по повод организацијата на Европското екипно атлетско првенство трета лига кое на 10 и 11 август ќе се одржи во Скопје.
Директорот на АМС очекува во периодот што следува атлетиката во нашата земја да биде подигната на едно повисоко ниво. Прва можност за популаризација на „кралицата на спортовите“ во Македонија е токму претстојниот Европски екипен шампионат.
– Една од најголемите заложби на Агенцијата за млади и спорт е организирање на големи манифестации кои што не само го промовираат спортот туку и убавините на нашата земја. Со организација на ова ЕП го ставаме Скопје на спортската светска мапа кој ќе биде домаќин на преку 430 учесници од повеќе од 14 земји. Во соработка со Атлетската федерација и во иднина ќе правиме вакви и слични активности со цел да ја вратиме атлетиката на пиедесталот на спортови во нашата држава, изјави Каевски на денешната прес-конференција.
Македонија на европскиот шампионат ќе ја претставуваат 26 атлетичари, од кои најмногу се очекува од Јован Стојоски, Дрита Ислами и Дарио Ивановски.
Претседателката на АФМ соопшти дека сѐ е подготвено за евро-шампионатот. Таа упати апел до вљубениците во атлетиката и спортот воопшто во голем број да дојдат на стадионот и со своето присуство да го збогатат овој меѓународен настан.
Најголеми фаворити за влез во втората лига се Исланд и Србија, а покрај нив ќе учествуваат и натпреварувачи од Албанија, Азербејџан, Андора, Босна и Херцеговина, Гиблартар, Ерменија, Косово, Лихтенштајн, Молдавија, Монако, Сан Марино и Црна Гора.
Натпреварите ќе се одржуваат на Националната Арена „Тоше Проески“.