Остатоци од древен брод што датираат од вториот век пред нашата ера беа откриени во Средоземното Море крај брегот на Палермо.
Според првите снимки, остатоците од бродот биле пронајдени на длабочина од 92 метри, а бродот бил натоварен со вински амфори.
„Медитеранот постојано ни дава вредни елементи за реконструкција на нашата историја поврзана со поморската трговија, типови на бродови и начини на транспорт“, рече Валерија Ли Вињи, која ја започна експедицијата.
Таа додаде дека сега ќе се дознае повеќе за поморскиот живот и односите меѓу тогашното население.
Сицилијанските власти го опишаа откритието како едно од најважните археолошки наоди во последните години, пренесува Guardian.
Пред неколку недели, сицилијанските археолози пронајдоа нешто слично, римски брод на длабочина од околу 70 метри во близина на островот Устика. На тој брод се пронајдени и амфори за вино од вториот век пред нашата ера.
Овие наоди треба да дадат нови информации за трговската активност на Рим на Медитеранот. Римјаните биле познати по својата трговија со зачини, вино, маслинки и други производи во Северна Африка, Шпанија, Франција и Блискиот Исток.
