Знамето на Босна и Херцеговина е едно од поновите во светот, а зад неговото меѓународно огнено крштевање се крие интересна анегдота.
Кога на Зимските олимписки игри 1998 година во јапонскиот град Нагано на свечената церемонија на отворањето излезе делегацијата на Босна и Херцеговина, светот за прв пат го виде новото знаме на оваа држава.
Овие ЗОИ не беа први за Босна и Херцеговина бидејќи државата учествуваше четири години претходно во норвешки Лилехамер, но тогаш под старото знаме кое ја идентификуваше само бошњачката заедница.
Новото знаме, кое оваа балканска држава го користи и ден денес, беше усвоено на 4 февруари 1998 година, само три дена пред почетокот на Игрите во Нагано. Дизајнот е на Младен Колобариќ, а главен поборник за неговиот избор беше високиот претставник за Босна и Херцеговина, Шпанецот Карлос Вастендорп.
Од тие причини ниту самиот Интернационален олимписки комитет не беше сигурен како точно изгледа знамето и дали ќе биде точно погодено на церемонијата на отворањето. Педантните Јапонци не погрешија, единаесеттемина Босанци продефилираа под своето ново знаме за кое ни самите не знаеја како точно изгледа, а целиот свет за прв пат го виде новото знаме на оваа екс-ју република.