Легендарниот Бразилец Рикардо Кака дефинитивно ја заврши својата играчка кариера.
Освојувачот на Златна топка од 2007 година после доаѓањето во Орландо во октомври остави можност да заигра за уште некој клуб, но два месеци подоцна сепак одлучи дека тоа нема да се случи.
„Мојата кариера се завршува овде. Ми беше потребно малку време, но донесов конечна одлука. Подготвен сум да го продолжам фудбалскиот живот и во друга улога“, изјави 35-годишниот Кака.
Бразилецот на тој начин можеби најавува дека ја прифатил понуда околу која италијанските медиуми веќе некое време пишуваат, а тоа е местото на спортски директор во Милан.
Кака со Милан освои Лига на шампиони, Серија А, Светското клупско првенство, италијанскиот и европскиот Суперкуп.
Тој е еден од четворицата фудбалери кои ја освоиле Лигата на шампионите, Светското првенство и Златната топка, заедно со Роналдињо, Ривалдо и Зинедин Зидан.
Кариерата ја започна во Сао Паоло, а покрај Милан и Орландо во МЛС, настапуваше и за Реал Мдрид.
За репрезентацијата на Бразил одигра 92 натпревари, постигна 29 погодоци и ја освои титулата првак на светот во 2002 година, како и два Купа на конфедерации (2005, 2009 година).