Експертскиот тим на Светска здравствена организација денеска пристигна во кинескиот град Вухан каде кон крајот на 2019 година беше откриен новиот коронавирус, за да го истражи потеклото на пандемијата.
Експертскиот тим во Вухан ќе биде околу еден месец, вклучително и двете недели карантин.
Петр Бен Ембарек, експертот на СЗО за животински болести кои преминуваат на други видови, го предводи тимот од десет независни експерти.
Виетнамскиот биолог Хунг Нгујен, кој е дел од тимот, истакна дека не очекува рестрикции на работата на групата во Кина.
Експертскиот тим на СЗО, по двонеделниот карантин ќе ги испитуваат вработените во истражувачките институти, болниците и пазарите за морска храна во Вухан, каде се претпоставува дека се појави COVID-19.
Кина го регистрира најголемиот скок во бројот на нозозаразени во пандемијата со коронавирус во изминатите десет месеци, бидејќи бројот на заразени со COVID-19 во североисточна провинција Хејлонџајанг минатата недела речиси тројно е зголемен, со што се зголемија и стравувањата кај здравствените работници пред големиот празник, Кинеска нова година, што се слави на 12 февруари.
Националната здравствена комисија денеска соопшти дека во последните 24 часа во земјата се регистрирани 138 нови случаи на коронавирус, наспроти 115 ден претходно, што е најголем скок од 5 март, јавуваат британските медиуми.
Во меѓувреме, едно лице умрело, што е прв смртен случај во најнаселената земја во светот од средината на мај минатата година.