Шпанскиот спортски дневен весник Marca направи анализа и покажа како би изгледала кошаркарската репрезентација на Југославија ако земјата уште постоеше денес.
Одвреме-навреме светските новинари си играат со претпоставката дека ако Југославија уште постоеше ќе имаше моќни спортски репрезентации.
Водејќи се по оваа премиса, шпански Marca ја „состави“ кошаркарската репрезентација на хипотетичката Југославија во 2020 година.
„Војната донесе крај на големиата победничка балканска држава. Југославија се распадна на повеќе помали земји. Тие имаат освојувано медали, но никогаш како во времето кога беа заедно“, почнува текстот на Marca.
Понатаму Шпанците се прашуваат колку далеку би стигнала кошаркарската репрезентација на Југославија ако таа држава уште постоеше.
„Кога гледаме со каков талент би располагала, одговорот што се наметнува е: Застрашувачки далеку“, објави Marca.
Плејмејкери би биле Милош Теодосиќ, Василије Мициќ и Горан Драгиќ – две легенди и моментно најдобриот плејмејкер во Европа.
Бекови и крила се Богдан и Бојан Богдановиќ и Немања Бјелица – „неисцрпната офанзивна моќ која би ја разбила одбраната на која било репрезентација на светот“, пишува Marca.
Посебен пасус е одвоен за Лука Дончиќ кој е најдобар европски кошаркар во моментов. „Неговиот талент, квалитет и сестраност го прават играч кој ги покрива сите надворешни позиции, а неговиот напаѓачки арсенал е незапирлив.“
Во поглед на играта под кош, Југославија повторно би била доминантна.
Никола Јокиќ е „играч кој не може да го дочуваат ни во НБА“, а покрај него Marca ги набројува и Дарио Шариќ, Бобан Марјановиќ, Никола Милутинов и Бојан Дубљевиќ.
Интересно е да се напомене дека авторот на текстот не зел предвид ниту еден играч од нашата земја и не ги спомнува репрезентативецот на Босна и Херцеговина Јусуф Нуркиќ и Црногорецот Никола Вучевиќ кои се истакнати играчи во своите НБА клубови.
На крајот на текстот се заклучува дека овој состав би ја ставил во неволја „секоја репрезентација во светот“, вклучувајќи го и американскиот Дрим Тим.
