Францускиот производител е познат по своите напредни технолошки иновации во минатото, но и по авангардниот дизајн на возилата. Еден од автомобилите кои придонесоа за ваквата репутација е и концептот Citroen Karin од 1980 година.
Citroen Karin бил претставен на автомобилскиот саем во Париз во 1980 година и е добар пример што се способни да направат автомобилските дизајнери кога ќе им се даде целосна слобода. Концептот имал футуристички дизајн кој тогашната публика ја восхитил.
За изгледот на автомобилот кој е обликуван во форма на пирамида, одговорен бил некогашниот шеф на дизајн во Citroen, Тревор Фиоре. Доколку не се земат во предвид страничните стакла, автомобилот имал една од најмалите кровни површини во историјата на автомобилите - отприлика колку А3 формат.
Од врвот на кровот, кон сите четири страни, се простирале огромни стаклени површини, а вратите се отворале нагоре.
Позицијата на возачот е во средина, а од левата и десната страна има место за уште двајца патници чии седишта се поместени малку наназад.
Денешната концепција на екран за мултимедијален систем на кој се сместени повеќето функции и команди, во тоа време бил далечна иднина, но Citroen имал слична идеја сите команди и копчиња да ги групира што поблиску до управувачот, за да бидат на дофат на рака на возачот.
Некои од копчињата се поставени на самиот волан, што асоцира на денешните мултифункционални управувачи. Зачетокот на мултимедијалниот дисплеј претставува малиот екран кој е поставен пред возачот наместо класичните инструменти.
Иако Citroen често знае да изненади со необично дизајнирани сериски модели, Karin отпочеток бил замислен исклучиво како дизајнерска студија, па треба да се набљудува и анализира исклучиво низ таа призма.