Студиите покажаа дека секоја десетта личност која заболела од COVID-19 развива симптоми на долга манифестација на болеста, но формални дијагностички препораки за потврда на долг ковид сè уште не се составени.
Американскиот Центар за контрола и превенција на болести (CDC) и некои други здравствени установи работат на тоа, но додека некои препораки не се состават секој кој е загрижен за своето здравје треба сам да се распраша за своите симптоми и со нив да разговара со својот лекар.
Некои симптоми се различни или слични на други болести па ни докторите не можат прецизно да ги дефинираат.
Епидемиолозите според досегашното искуство заклучија дека скоро секој телесен орган може да биде зафатен од COVID-19, но не знаат дали симптомите на долг ковид се предизвикани директно од вирусот или тие се последица од стресот и траумата што инфекцијата ги носи со себе.
Одвоени се неколку познати начини како долгиот ковид може да влијае на пациентите:
1. Зашеметеност во главата
Секој петти пациент искусил „магла во главата“ шест месеци по прележан ковид, независно дали бил или не бил хоспитализиран, покажала мета-анализа од 51 студија за ковид.
Најчесто луѓето имале проблеми со краткотрајно паметење, концентрацијата или тешкотии во наоѓање зборови во текот на разговор.
2. Умор
Дури 60% од хоспитализираните пациенти чувствувале умор и слабост во мускулите шест месеци по ковид, покажа опсежна кинеска студија.
3. Проблеми со спиењето
Секој петти пациент има проблеми со спиењето 6 месеци по болеста, покажала мета-анализата на 51 студија.
4. Губење на здивот и упорна кашлица
Ова се вообичаени симптоми кои се појавуваат од еден месец до половина година по прележан ковид, покажа студија спроведена на 73.000 американски воени ветерани.
5. Срцеви проблеми
Аритмија е вообичаен симптом 6 месеци по болеста, покажа истата студија. Овие пациенти имаат зголемен ризик од развој на болести на срцето, атеросклероза и крвни згрутчувања половина година по болеста.
6. Невролошки симптоми
Од нив страдаат третина пациенти кои се носат со долг ковид, во нив спаѓаат нарушено расположение како нервози и депресија.
7. Губење на мирисот
Третина од оние кои со ковид го загубиле осетот за мирис, тој не се вратил во текот на два или повеќе месеци, покажа американска студија.
8. Дигестивни проблеми
Во една кинеска студија, повеќе од 40% од хоспитализираните пациенти три месеци по примарната инфекција чувствувале проблеми со губење на апетитот, мачнина, рефлукс и дијареја.
9. Притисок во градите и болка во зглобовите
Ова е најчестиот проблем бидејќи се јавува кај 90% од луѓето кои страдаат од долг ковид, покажа студија. Некои од симптомите траеле и до 7 месеци.
10. Дијабетес и болести на бубрезите
Студија спроведена на американски воени ветерани покажа дека долгиот ковид носи 39 проценти поголем ризик од развој на дијабетес во текот на 6 месеци по инфекција. Зголемен е и ризикот од развој на акутни болести на бубрезите.
Останати симптоми
Пациентите кои страдаат од долг ковид пријавиле и останати симптоми коишто научниците уште не ги потврдиле со поголеми студии, а станува збор за значајно губење на косата, кожен осип, неуредни и болни менструации и зуење во ушите.
