Живот

Како да ги пронајдете најдобрите ресторани во светот: Водич на Ентони Бордејн

18. мај 2018 - 11:34 | К.З.

Добрата храна и добрите ресторани ги има насекаде, но кога патувате е малку потешко да ги пронајдете. За да го пронајдете совршениот ресторан каде храната ќе биде вкусна а услугата врвна, познатиот готвач и ТВ водител Ентони Бордејн реши да сподели неколку совети со вас.

Ентони Бордејн пропатува преку 130 земји како водител на шоуто „Anthony Bourdain: Parts Unknown“ и тој знае дека наоѓањето на добар ресторан во непозната држава може да биде пеколно тешко, посебно ако не знаете да го зборувате локалниот јазик.

Првото нешто на што треба да внимавате, според Бордејн, е да не одберете ресторан кој има ставено слики од јадењета, било да е тоа во менито или во рамки закачени на ѕидот. Тој вели дека најдобрите ресторани се оние во кои јадат локалците, а на нив не им е потребна слика за да одберат каде да јадат, туку едноставно знаат што да очекуваат од храната таму.

Бордејн вели и дека не треба да се плашите од ресторани чие мени се состои од само неколку видови на јадења. Тоа најчесто е добар знак, бидејќи ви дава до знаење дека готвачот си ја знае кујната, а и работата.

Спротивно на она што ќе ви го каже секој друг човек, Бордејн тврди дека некои од најдобрите ресторани имаат нечисти тоалети и примаат миленици во нивните простории.

„Порано велев дека нечист тоалет е знак дека не треба да јадете во тој ресторан, но сега се уверив дека спротивното е точно. Некои од најдобрите јадења кои ги имам пробано доаѓале од места на кои не им било гајле како изгледа тоалетот. Таму знаат дека храната им е добра, и тоа им е доволно“, вели Бордејн.

Тој препорачува да ја следите групата туристи кога одите на патување во непозната земја. Тие веројатно се веќе упатени каде треба да јадат, па резултатот многу веројатно ќе биде вкусна храна. Она што тврди дека мора да се избегнува е било кој совет за храна кој ќе ви го понуди Американец.

„Ако следите група Американци како одат кон некој ресторан, или ви го препорачаат тој ресторан, ве молам веднаш оддалечете се од нив бидејќи тие не знаат ништо за добрата храна“, завршува Ентони Бордејн.

Коментирај