Народот во руската република Дагестан масовно излезе на улиците за да ја прослави победата на УФЦ шампионот Хабиб Нурмагомедов над Ирецот Конор Мекгрегор.
Дагестанецот кој нема изгубено ниту една борба во неговата кариера беше чествуван и дочекан во родната земја како бог - 10.000 обожаватели го исполнија локалниот стадион каде се обрати самиот шампион.
Нурмагомедов, кој го победи Мекгрегор во четвртата рунда со технички нокаут, е единствениот руски државјанин кој освоил УФЦ титула.
Меѓутоа, победата беше засенета од тепачката што изби во салата по борбата, откако Дагестанецот рипна преку оградата и ги нападна членовите на стручниот штаб на Ирецот. На напнатата борба ѝ претходеа вербални препукувања меѓу двајцата ММА борци, во кои Конор „удри“ на религијата и семејството на Нурмагомедов.
Пред преполниот стадион, Хабиб се обиде да објасни зошто изреагирал така и која била причината за наталожениот гнев и бес во него непосредно пред борбата во Лас Вегас.
„Се молев на Бога замо за едно – да ме остават на само во рингот со кловнот од Ирска. Се молев за тоа буквално секој ден. Се молев мерењето да помине без инциденти и само да дојде мигот кога ќе нѐ заклучат во кафезот. Пред борбата беа кажани многу работи, што ме направи непресметлив во рингот. Сакав да му покажам која е разликата меѓу моите и неговите сфаќања и народите од кои потекнуваме“, рече Нурмагомедов.
