Повеќето деца имаат благи симптоми на коронавирус, покажаа резултатите од истражување спроведено во Европа. Четири од 582 деца, кои биле под надзор, починале од коронавирус, а две од нив имале некоја друга хронична болест.
Децата имале благи симптоми, некои од нив биле позитивни на коронавирусот и немале никакви симптоми, но едно од десет деца биле на интензивна нега. Во истражувањето учествувале 582 деца од 15 европски земји, на возраст од 3 дена до 18 години.
Сите кои учествувале во истражувањето биле позитивни на коронавирус од април. Четвртина не покажале никакви симптоми.
Од четирите смртни случаи ниту еден не бил кај деца помлади од 10 години.
Кои симптоми ги имале децата?
65% од нив имале температура, 54% инфекција на горните дишни патишта, 25% воспаление на белите дробови и 22% гастроинтестинални симптоми.
Истражувачите велат дека степенот на смртност кај децата е веројатно значително понизок од оној забележан во студијата, бидејќи некои деца со благи симптоми не се тестирани ниту им е дијагностициран коронавирус.
Потребни се повеќе податоци за лекарите да одлучат на кој начин најдобро може да се лекуваат децата, ако се разболат.
„Сепак, значаен број од децата развиваат сериозна болест и имаат потреба од интензивна нега, а тоа треба да се земе во обѕир при планирањето на здравствените ресурси“, вели доктор Марк Тебруег.
Кај повеќето деца се работело и за други респираторни вируси, покрај коронавирусот. Истражувањето е објавено во The Lancet Child and Adolescent Health.