Манчестер Јунајтед синоќа одигра без голови во натпреварот против Севиља, во рамки на првата средба од Лигата на шампионите во осминафиналето, а само благодарение на чудата кои ги правеше на голот семоќниот Де Геа, тимот на Мурињо успеа да избегне пораз во Шпанија.
Јунајтед повторно беше инфериорниот тим во однос на својот противник, одиграа катастрофален натпревар, но за нивна среќа го имаа расположениот Шпанец кој ги бранеше сите удари кон неговиот гол, и со оваа партија потврди дека нема дилеми околу тоа кој е најдобар голман на светот во овој момент.
Меѓутоа, што е со неговите соиграчи?
Општо е познато дека Жозе Мурињо не е поддржувач на напаѓачки фудбал, но исто така не е поддржувач и кога екипата игра дефанзивно и е инфериорна.
Најсвеж пример за таа разлика е синоќашниот натпревар на „Стемфорд Бриџ“, меѓу екипите на Челзи и Барселона.
Меѓутоа, што се однесува до „Ѓаволите“, нивната игра во последно време во најмала рака можеме да ја карактеризираме како досадна и очајна.
На последните пет натпревари Манчестер Јунајтед беше поразен два пати во Премиер лигата како гост – од Тотенхем (2:0) и Њукасл (1:0), два пати го совладаа Хадерсфилд со 2:0, прво во првенството дома, па во ФА купот во гости, додека синоќа одиграа со Севиља без голови, благодарение на, како што веќе нагласивме, неверојатниот Давид Де Геа.
На тие пет натпревари фудбалерите на Манчестер Јунајтед упатиле вкупно 46 удари кон противничкиот гол, додека ривалите упатиле дури 80 кон нивниот гол.
Поради ова, неверојатен звучи податокот дека фудбалерите Јунајтед на тие пет натпревари постигнале повеќе голови отколку што примиле (4:3).
