Во понеделникот вечерта во Париз ФИФА го одржа настанот The Best на кој беа прогласени победниците во повеќе категории, а во центарот беше Меси кој ја освои главната награда за најдобар играч.
Македонија преку три свои претставници гласаше во изборот за најдобар фудбалер, а како и секоја година, така и сега, ФИФА јавно ги обајви гласовите од секој поединец.
Капитенот на македонската репрезентација, Стефан Ристовски, токму на Меси му доделил максимални 5 поени, 3 му дал на Лука Модриќ, додека 1 на Хулиан Алварес. Интересно, Ристовски ги остави без бодови Килјан Мбапе и Карим, Бензема, кои завршија на второто и третото место, зад Меси.
Селекторот Благоја Милевски, пак, гласајќи всушност го погодил конечниот редослед. Петте поени му ги дал на Меси, 3 на Мбапе, а 1 на Бензема.
Претставникот на македонските спортски медиуми, Мијалче Дургутов, познат од деновите во згаснатиот реномиран СКОК, исто така за најдобар го гласал Меси. Три поени му дал на Мбапе, а еден на Модриќ.
Тројцата македонски претставници гласале идентично кога станува збор за петте поени, сите давајќи му ги на Меси.
Аргентинецот на крајот победи во изборот на ФИФА освојувајќи 52 гласа наспроти 44-те на Мбапе, а Бензема доби само 34.