Авиокомпаниите секогаш наоѓаат начини да заштедат гориво, а некои од начините се толку апсурдни што звучи смешно кога ќе го слушнете првпат но потоа ќе се запрашате како решението може да е толку едноставно.
Годината е 1987, а American Airlines решаваат да скратат по една маслинка од секоја салата која ја служат во нивните авиони и со тоа да го намалат трошокот на компанијата за 40.000 долари годишно. Заштедата е двојна – прво, компанијата купува помалку маслинки и второ, авионот е полесен и троши помалку гориво.
Маслинките не се големи, но кога е во прашање тежината на авионот и количината на гориво потребно да се придвижи еден од нив, авиокомпаниите не се шегуваат. А и мора да биде така, бидејќи авионите трошат по еден литар гориво во секунда.
Постојат повеќе начини да се намали тежината на авионот. На пример, Virgin Atlantic користи авиони со потенки стакла и ги изфрли од употреба тешките послужавници од бизнис-класата. Исто така, чоколадите и останатите слатки беа заменети со лајт варијанта, оброците беа редизајнирани и беше направена поголема понуда на пијачки навечер кога помалку луѓе пијат.
Проценките велат дека намалувањето на вкупната тежина за само половина килограм може да ѝ заштеди на компанијата преку 14.000 галони гориво на годишно ниво.
Начините за заштеда на гориво се безбројни, а некои од нив дури и апсурдни. Така, British Airways почна да печати весници и магазини на потенка хартија и со тоа заштеди 300.000 долари годишно со намалување на потрошувачката на гориво. Компанијата Tomas Cook ги опреми авионите со полесни седишта и им продава на патниците купони за користење на услугите во авионот. Со купоните, заштедуват на оброци, тоалетна хартија и слично. Од друга страна, авиокомпанијата Ryanair не е толку суптилна и им препорача на луѓето од персоналот да внимаваат на нивната тежина. Најбруталната од сите е компанијата Samoa Air, која во 2013 година воведе „такса за дебели“, според која цената на билетот се одредуваше според тежината на патникот.
„Авионот работи подобро кога е полесен. Ние не продаваме седишта, ние продаваме тежина“, рече тогашниот извршен директор на Samoa Air, Крис Ленгтон за CNN.
Истражувачите од Универзитетот МИТ пресметаа дека секој патник кој има со себе мобилен телефон ја чини компанијата Southwest Airlines дополнителни 1,2 милиони долари за трошоците за гориво, а доколку секој би носел лаптоп, тоа би ги чинело 21, 6 милиони долари годишно.
