Врската помеѓу тренерот и фудбалерот има огромно влијание на играта која тимот ја прикажува на теренот, а нема поголем пример за тоа во фудбалскиот свет од односот помеѓу Пеп Гвардиола и неговите играчи, за кои се добива впечаток дека се подобруваат од ден на ден.
Според Пеп Гвардиола, најважниот квалитет кој мора да го поседува секој фудбалер е играта со топка, односно елементарната техника. Поради тоа, тој постојано работи на унапредување на овој дел од играта кај сите негови играчи, дури и голманите.
Можеби изгледа како застарен тренинг метод, но популарно нареченото „Рондо“ или според нашиот фудбалски речник - „шева“ е наједноставниот, но и најефективниот начин за подобрување на техниката кај фудбалерите.
Се работи за игра во која учествуваат повеќе фудбалери, од кои еден, или во случајот на екипите кои ги води Пеп – двајца, стојат во средина и се опкружени со играчи кои треба да си ја додадат топката меѓу себе. Задачата на фудбалерите во средина е да ја пресечат топката и да го прекинат додавањето, за да си обезбедат место во кругот и да добијат шанса да ги вежбаат додавањата.
Преку „Рондото“ се подобруваат повеќе аспекти од играта – брзи и прецизни додавања, координација со соиграчите, прием на топката, но и дефанзивни квалитети, како бркање на топката, учество во покривањето на простор и читање на намерите на противникот.
Гвардиола го наследи „Рондото“ од Јохан Кројф, кој го имплементираше во тренинзите на Барселона, но потоа Пеп успеа да го усоврши и да наметне некои негови филозофии кои им помагаат на неговите тимови да играат брз и атрактивен фудбал со неверојатна контрола над топката.