Кинескиот автомобилски бренд Geely смисли иновативен начин како бесконтактно да ги достави новите автомобили до купувачите.
Пандемијата со Covid-19 тешко се одрази на многу индустриски гранки, вклучувајќи ја и автомобилската индустрија. Освен на производството, оваа ситуација драстично се одрази и на продажбата на нови, штотуку направени возила.
Со оглед на тоа дека епидемијата почна од Кина и таму најтешко се одрази, тамошните автомобилски компании уште од февруари се обидуват да најдат начини да допрат до потенцијалните купувачи.
Затоа Geely Auto, откако продажните автосалони останаа без продавачи и без посетители, реши да почне сопствена услуга за онлајн продажба која им овозможува на купувачите не само да го одберат своето возило, туку и да им биде испорачано на домашна адреса – од тест-возење до продажба – ако се одлучат да го купат.
На овој начин велат дека продале повеќе од 10.000 возила, а дополнителни 110.000 потенцијални клиенти веќе се регистрирале.
Geely објави и видео во кое покажува како се одвива процесот на испорака кој е целосно бесконтактен.
Новиот автомобил целосно се дезинфицира, се носи на домашна адреса со пајак возило, а клучевите се доставуваат со дрон.