Триесет и тригодишниот Марк Закерберг има многу обврски во текот на работниот ден. Освен што ја води најпопуларната социјална мрежа вредна 433,25 милијарди долари, има и своја фондација, патува и е семеен човек.
Исто така, води здрав живот и редовно вежба. Неговата продуктивност се должи на балансирање: ги отстранува сите неважни работи од животот и си поставува амбициозни цели.
Business Insider објави фотографии од еден вообичаен ден на Закерберг. За да стигне да ги заврши сите обврски тој станува во 8 часот и веднаш проверува Facebook, Messenger и WhatsApp. Потоа се опушта со вежбање и тоа го прави три пати неделно. Понекогаш излегува на прошетка со кучето.
По вежбањето следи туширање и појадок. Не е пребирлив кога станува збор за храна. За да не размислува што ќе облече, секој ден носи фармерки и сива маица.
“Навистина сакам да си го ‘исчистам’ животот и да донесувам што е можно помалку одлуки што не се однесуваат на тоа како можам да придонесам повеќе за заедницата“, вели Закерберг.
Околу 60 часа неделно поминува работејќи на Facebook, но постојано размислува за компанијата што ја води социјалната мрежа. Само на неговата официјална страница работат 12 луѓе.
Кога не работи, учи мандарински и чита книги. Често патува и се состанува со важни луѓе, но и со најобични луѓе.
Најмногу сака да одвојува време за семејството, сопругата Присила Чен и ќерката Макс.
Тој зеде породилно отсуство од два месеци кога се роди Макс и постојано се грижеше за неа.
Секоја вечер кога ја заспива ќерката ѝ ја кажува еврејската молитва Mi Shebeirach и со тоа го завршува денот.