На нешто повеќе од 400 светлосни години од Земјата се наоѓа една млада егзопланета. Тоа само по себе не е толку необично. Научниците досега откриле илјадници егзопланети, или планети надвор од Сончевиот Систем.
Но, она што ја прави посебна оваа далечна планета е тоа што астрономите добија директна слика за неа, што е многу редок случај. Имено, планетата 2M0437b е една од најмладите егзопланети од која имаме директна слика.
„Со анализа на светлината што доаѓа од оваа планета, можеме да научиме нешто за нејзиниот состав, а можеби и за тоа каде и како настанала, во одамна исчезнатиот диск од гас и прашина што се формирал околу нејзината матична ѕвезда“, вели астрономот Ерик Гаидос од Универзитетот на Хаваи во Манои.
Директно и индиректно набљудување на далечни планети
Постојат неколку причини зошто е тешко да се добие директна слика на егзопланета. За разлика од ѕвездите околу кои орбитираат, овие планети се многу мали и со мала осветленост, што значи дека обично се премногу темни за да се видат со нашата сегашна технологија.
Затоа, научниците генерално откриваат егзопланети на индиректен начин, врз основа на нивниот ефект врз нивните ѕвезди. Ако егзопланета помине меѓу нас и ѕвезда за време на нејзината орбита, тогаш можеме да регистрираме мали, периодични промени во нејзината светлина.
Освен тоа, егзопланетата има и слаб гравитациски ефект врз ѕвездата, што таа по малку се „ниша“, односно предизвикува мало поместување на брановата должина на нејзината светлина, пишува Science Alert.
Овој вид на индиректно набљудување на егзопланетите е најлесно ако планетата е многу голема и ако е блиску до ѕвезда, така што повеќето потврдени егзопланети се масивни и во блиски орбити.
Колку е голема 2M0437b?
Егзопланетата 2M0437b е прилично голема, но е и доста оддалечена од својата ѕвезда - на околу 100 астрономски единици (Плутон е оддалечен околу 40 астрономски единици од Сонцето). Обично егзопланетите што се далеку од нивната ѕвезда се премногу студени за да испуштаат инфрацрвено зрачење, но овде тоа не е случај поради младоста на самата планета.
Бидејќи е стара само неколку милиони години, оваа планета е сè уште релативно топла (1.127 до 1.227 степени Целзиусови) поради интензивните процеси што се случуваат при нејзиното формирање. Ова значи дека можеме да ја видиме иако е оддалечена 417 светлосни години од нас.
Научниците ја регистрираа во 2018 година користејќи го телескопот Субару на Хаваи, а подоцна го набљудуваа во инфрацрвено зрачење преку опсерваторијата W. M. Keck.
Студијата Zodiacal Exoplanets in Time (ZEIT) XII: A Directly-Imaged Planetary-Mass Companion to a Young Taurus M Dwarf Star наскоро треба да биде објавена во Monthly Notices of the Royal Astronomical Society.