Пред само неколку години во Саудиска Арабија беа забранети забавите за Ноќта на вештерките, а денес работите се целосно сменети. Власта организира и спонзорира „хорор викенд“.
„Саудиска Арабија се менува“, изјави пред медиумите млад човек маскиран како магионичар, пренесе The New York Times.
Тој, како и неговиот пријател Јахја, двајцата на возраст од 21 година, никогаш немале можност да го прослават празникот Ноќта на вештерките, бидејќи бил сметан за туѓ, пагански празник, односно како грешен, непотребен и чуден празник.
Во 2018 година, полицијата дури спроведе голема рација на забава за Ноќта на вештерките и уапси многу маскирани мажи и жени.
Но, оваа година ситуацијата е поинаква. Во делови од Ријад, главниот град на Саудиска Арабија, изгледа како суштества од опседната куќа да избегале и го зазеле градот. Чудовишта, вештерки, крадци и слични ликови можеше да се видат насекаде минатата ноќ.
Ова сценарио е знак за промената што доаѓа со новиот премиер и престолонаследник Мохамед бин Салман, кој од доаѓањето на власт во 2015 година постепено почна да ги укинува социјалните ограничувања.
Владата не го организираше фестивалот конкретно по повод Ноќта на вештерките, туку организираше „хорор викенд“, кој совршено се совпадна со овој настан.
