Зинедин Зидан се врати на клупата на Реал Мадрид по 284 дена.
По низата лоши резултати, исфрлањето од Лигата на шампиони, Купот на кралот и трката за прваци на Шпанија, Реал западна во голема криза.
Тоа на свој грб најдобро го почувствува Сантијаго Солари кој во понеделникот беше разрешен од должноста тренер, а на негово место се врати легендарниот Французин.
Зидан денеска го одржа првиот тренинг со играчите и една работа на сите им беше заедничка: насмевката на лицата. За разлика од изминативе месеци, речиси сите играчи на Реал тренираа со насмевка на лицето и во видно добро расположение.
Францускиот стручњак се сретна со многу познати лица, но и со неколку непознати. Зидан учествуваше во тренингот, што не е ново и невообичаено за него, но беше за помладите играчи кои го гледаа со одушевување.
Реал до крајот на сезоната има 11 натпревари за играње и сите се во рамки на шпанското првенство. Прв на распоредот е натпреварот во сабота кога на „Сантијаго Бернабеу“ доаѓаат Селта Виго.
Интересно е што токму овој клуб беше последниот противник на Зидан во неговиот прв мандат. Тогаш Реал славеше со 6:0, а неколку дена подоцна „Мадриѓаните“ ја освоија Лигата на шампиони, а Зидан потоа си замина од клупата.
На првиот тренинг Зидан ги немаше на располагање повредените Винисиус, Васкез и Карвахал , а неговите миленици Лука Модриќ, Марсело, Карим Бензема и Серхио Рамос присуствуваа на собирот со старо-новиот тренер.
